ઇડર: ગાંઠીયોલમાં જમીન વિવાદમાં ₹30 હજારનું નુકસાન
ઇડરના ગાંઠીયોલમાં જમીન વિવાદમાં ખેતરની ફેન્સિંગ તોડી ધમકી અપાઈ
ઇડર: સાબરકાંઠા જિલ્લાના ઇડર તાલુકામાં આવેલા ગાંઠીયોલ ગામમાં જમીન વિવાદને કારણે ખેતરના ફેન્સિંગના થાંભલા તોડી નાખી નુકસાન પહોંચાડવાની અને મહિલાને ધમકી આપવાની ફરિયાદ નોંધાતા ચકચાર મચી છે. અમદાવાદમાં સ્થાયી થયેલા 55 વર્ષીય જનકકુંવરબા ચેતાવતાએ આ અંગે પ્રતાપસિંહ જેતાવત અને તેમના પરિવારના સભ્યો સામે ગંભીર આક્ષેપો સાથે પોલીસ ફરિયાદ કરી છે.
ફરિયાદમાં જણાવ્યા મુજબ, ગાંઠીયોલ ગામમાં આવેલી તેમની જમીન બાબતે નવેમ્બર 2025 થી વિવાદ ચાલી રહ્યો છે. તાજેતરમાં જ્યારે જનકકુંવરબા પોતાના ખેતરની ફરતે લોખંડની જાળી અને થાંભલાની ફેન્સિંગ કરાવવા માટે ગયા હતા, ત્યારે આરોપી પ્રતાપસિંહ માનસિંહ જેતાવત અને શર્મિષ્ઠાબેન પ્રતાપસિંહ જેતાવતે ખેતરમાં બિનઅધિકૃત રીતે પ્રવેશ કર્યો હતો. આરોપીઓએ ફેન્સિંગનું કામ અટકાવી દીધું હતું અને મજૂરોની હાજરીમાં જ ફેન્સિંગના થાંભલાઓ તોડી પાડ્યા હતા. આ તોડફોડમાં અંદાજે ₹30,000 ની મિલકતને નુકસાન થયું હોવાનું જણાવાયું છે.
આટલેથી ન અટકતા, આરોપીઓએ મહિલા સાથે અભદ્ર વર્તન કરી તેમને જાનથી મારી નાખવાની ધમકી પણ આપી હતી. પીડિત મહિલાએ આ અંગે ઇડર પોલીસનો સંપર્ક સાધ્યો હતો. પોલીસે ઘટનાની ગંભીરતાને ધ્યાને લઈને ભારતીય ન્યાય સંહિતા (BNS) ની કલમ 329(3), 324(4), 351(2) અને 54 હેઠળ એફઆઈઆર નોંધી છે. હાલમાં હેડ કોન્સ્ટેબલ ભૂપેન્દ્રસિંહ આ સમગ્ર કેસની તપાસ ચલાવી રહ્યા છે. પોલીસ દ્વારા ખેતરની માલિકીના કાગળો અને અગાઉના વિવાદોની પણ તપાસ કરવામાં આવી રહી છે. ગ્રામીણ વિસ્તારોમાં જમીન પચાવી પાડવા અથવા વિવાદ ઊભો કરવાના કિસ્સાઓ રોકવા માટે પોલીસ કડક વલણ અપનાવી રહી છે. આ ઘટનાને પગલે ગામના અન્ય જમીન માલિકોમાં પણ ચર્ચા જાગી છે.
