વડોદરા: એડવાન્સ મેન્યુફેક્ચરિંગ અને ઇન્ડસ્ટ્રી 4.0 પર સેમિનાર
વડોદરામાં એડવાન્સ મેન્યુફેક્ચરિંગ ક્ષેત્રે ગુજરાતના ઔદ્યોગિક ભવિષ્યનો રોડમેપ તૈયાર
ગુજરાતને ઉત્પાદન ક્ષેત્રે વૈશ્વિક સ્તરે અગ્રેસર બનાવવાના મિશન સાથે વડોદરામાં એક ઉચ્ચ સ્તરીય રાષ્ટ્રીય સેમિનાર યોજાયો હતો. ગુજરાત રાજ્ય ટ્રાન્સફોર્મેશન ઇન્સ્ટિટ્યૂશન (GRIT) અને GIDC ના ઉપક્રમે આયોજિત આ સેમિનારમાં રાજ્યના ઔદ્યોગિક ભવિષ્ય અને ખાસ કરીને એડવાન્સ મેન્યુફેક્ચરિંગ ક્ષેત્રની તકો પર ઊંડાણપૂર્વક ચર્ચા કરવામાં આવી હતી.
GRIT ના સી.ઇ.ઓ. એસ. અપર્ણાએ તેમના મુખ્ય વક્તવ્યમાં જણાવ્યું હતું કે, જો આપણે વૈશ્વિક સ્પર્ધામાં ટકી રહેવું હોય તો પરંપરાગત મેન્યુફેક્ચરિંગ પદ્ધતિઓમાંથી બહાર નીકળીને ઉચ્ચ-મૂલ્ય ધરાવતા ટેકનોલોજી આધારિત ઉત્પાદનો પર ધ્યાન કેન્દ્રિત કરવું પડશે. તેમણે ઔદ્યોગિક ક્લસ્ટરોમાં ઇન્ડસ્ટ્રી 4.0 ના અમલીકરણને અત્યંત આવશ્યક ગણાવ્યું હતું. આ પ્રસંગે વડોદરાના મ્યુનિસિપલ કમિશનર અરુણ મહેશ બાબુએ શહેરની વ્યૂહાત્મક ભૂમિકા સમજાવતા કહ્યું કે, બુલેટ ટ્રેન અને ફ્રેઈટ કોરિડોર જેવા મેગા પ્રોજેક્ટ્સ વડોદરાને રોકાણકારો માટે એશિયાનું સૌથી આકર્ષક કેન્દ્ર બનાવશે.
સેમિનાર દરમિયાન આર્ટિફિશિયલ ઇન્ટેલિજન્સ (AI) અને મશીન લર્નિંગના ઉપયોગથી કેવી રીતે ઉત્પાદન ખર્ચમાં ઘટાડો અને ગુણવત્તામાં વધારો કરી શકાય તે માટે KPMG ના નિષ્ણાત અભિષેક ગુપ્તાએ ટેકનિકલ રોડમેપ રજૂ કર્યો હતો. પેનલ ચર્ચાઓમાં GE એરોસ્પેસ, L&T, MG ઇન્ડિયા અને હનીવેલ જેવી ટોચની કંપનીઓના પ્રતિનિધિઓએ ભાગ લઈ માનવ મૂડી અને ડિજિટલ ટ્રાન્સફોર્મેશન પર ભાર મૂક્યો હતો. નિષ્ણાતોએ સંમત થયા હતા કે પ્રાદેશિક શક્તિઓને વૈશ્વિક સ્તરે લઈ જવા માટે કૌશલ્ય વિકાસ અને આધુનિક ઇકોસિસ્ટમ અનિવાર્ય છે.
કાર્યક્રમના સમાપન તબક્કે MNRE ના સચિવ સંતોષ કુમાર સારંગીએ ઉદ્યોગકારોની જરૂરિયાતોને સમજીને કેન્દ્ર અને રાજ્ય સરકાર દ્વારા પૂરતો સહયોગ આપવાની ખાતરી આપી હતી. આ સેમિનારમાં જિલ્લા કલેક્ટર અનિલ ધામેલીયા અને GIDC ના ઉચ્ચ અધિકારીઓ સહિત મોટી સંખ્યામાં રોકાણકારો અને ઉદ્યોગપતિઓ ઉપસ્થિત રહ્યા હતા. આ કાર્યક્રમ આગામી સમયમાં ગુજરાતના ઔદ્યોગિક લેન્ડસ્કેપમાં મોટું પરિવર્તન લાવશે તેવી અપેક્ષા રાખવામાં આવી રહી છે.
