સોના-ચાંદીના ભાવમાં તોતિંગ વધારો: ચાંદી ₹2.53 લાખ પાર
સોના-ચાંદીના ભાવમાં ભડકો: ચાંદીમાં ₹17,000નો તોતિંગ ઉછાળો
સોના-ચાંદીના માર્કેટમાં આજે ભયાનક તેજીનો વિસ્ફોટ થયો છે, જેણે છેલ્લા ત્રણ દિવસની થોડીઘણી રાહતને એક જ ઝાટકે ખતમ કરી નાખી છે. ચાંદીના ભાવમાં 7%નો જંગી વધારો એટલે કે સીધો ₹17,000નો ઉછાળો એ બજારની નબળી નસ પર વાર કરવા સમાન છે. આજે 1 કિલો ચાંદી ₹2.53 લાખ અને સોનું ₹1.45 લાખને પાર કરી ગયું છે. આ કોઈ કુદરતી તેજી નથી, પરંતુ વૈશ્વિક સટ્ટાખોરો અને એક્સચેન્જ દ્વારા લાદવામાં આવેલા નવા નિયમોનું પરિણામ છે જે સામાન્ય નાગરિકોના ખિસ્સા ખાલી કરી રહ્યા છે.
શિકાગો મર્કેન્ટાઇલ એક્સચેન્જ (CME) દ્વારા સોના અને ચાંદી પર માર્જિન મનીમાં વધારો કરાતા માર્કેટમાં અફરાતફરી મચી છે. સોના પર 8% અને ચાંદી પર 15% માર્જિન થવાનો અર્થ એ છે કે હવે ટ્રેડર્સે સોદો જાળવી રાખવા માટે વધુ સિક્યોરિટી મની જમા કરાવવી પડશે. આ દબાણ હેઠળ જ્યારે નાના વેપારીઓ સોદો કાપે છે ત્યારે ભાવમાં અકુદરતી ઉછાળો આવે છે. પ્રોફિટ બુકિંગના નામે રોકાણકારો જે રમત રમી રહ્યા છે તેમાં મધ્યમવર્ગનો ગ્રાહક મરણતોલ ફટકો અનુભવી રહ્યો છે. ઇન્ડિયા બુલિયન એન્ડ જ્વેલર્સ એસોસિયેશન (IBJA) ના આંકડા મુજબ, 24 કેરેટ સોનાનો ભાવ ₹1,50,708 પર પહોંચી ગયો છે.
હકીકત એ છે કે MCX પર સેકન્ડોમાં બદલાતી કિંમતો સામાન્ય ખરીદદારોને ભ્રમિત કરી રહી છે. ફિઝિકલ ડિમાન્ડ ઘટવા છતાં ભાવો કેમ વધે છે? તે એક મોટો યક્ષ પ્રશ્ન છે જે તંત્રની રહેમનજર હેઠળ ચાલતી સટ્ટાખોરી તરફ આંગળી ચીંધે છે. શું આ માર્કેટ માત્ર અમીરો અને મોટા સટ્ટાખોરો માટે જ અનામત છે? ગ્રાહકોએ હવે સોનાને રોકાણ નહીં પણ એક આર્થિક જોખમ તરીકે જોવાની ફરજ પડી છે. લગ્નસરાના સમયમાં જ ભાવોમાં આવો તોતિંગ ઉછાળો ઝીંકવો એ ગ્રાહકોના ખિસ્સા પર સીધો ડાકો નાખવા જેવું છે. સરકાર અને સેબીએ આ અનિયંત્રિત માર્કેટ વોલેટિલિટી સામે કડક પગલાં લેવા જોઈએ, અન્યથા સોનું ખરીદવું એ મધ્યમવર્ગ માટે માત્ર એક અફસોસ બનીને રહી જશે. અત્યારે જે રીતે ભાવોમાં કૃત્રિમ તેજી લાદવામાં આવી છે, તે જોતા સામાન્ય જનતાએ આ રોકાણકારોના માયાવી ખેલથી ચેતવાની જરૂર છે. શું આ લૂંટ પર કોઈ લગામ આવશે કે પછી સામાન્ય માણસની મહેનતની કમાણી આ જ રીતે સોનાના ભડકામાં હોમાતી રહેશે?
