રાજકોટ યાર્ડમાં મગફળી-કપાસની રેકોર્ડ આવક, ખેડૂતોને ₹1200 સુધીના ભાવ
રાજકોટ: દિવાળીના તહેવારો નજીક આવતા સૌરાષ્ટ્રના ખેડૂતોમાં આનંદનો માહોલ છે. ગત વર્ષે સારો વરસાદ થવાને કારણે ખેડૂતોને મગફળી અને કપાસનો બમ્પર પાક ઉતર્યો છે, જેને કારણે રાજકોટ માર્કેટિંગ યાર્ડ (બેડી) ખાતે છેલ્લા ત્રણ દિવસ દરમિયાન જણસીની મોટાપાયે આવક નોંધાઈ છે, અને જગતાતને સારા ભાવ મળી રહ્યા છે.
છેલ્લા ત્રણ દિવસમાં રાજકોટ યાર્ડમાં અંદાજે 50 હજાર મણ મગફળી અને 38,200 મણ કપાસની જંગી આવક નોંધાઈ છે. આ ઉપરાંત, દિવાળીના ખર્ચને પહોંચી વળવા અને શિયાળુ વાવેતરની તૈયારી માટે ખેડૂતો જીરું, તલ અને નવી સિઝનનો સોયાબીનનો જથ્થો પણ વેચાણ માટે લાવ્યા હતા. કુલ મળીને, ત્રણ દિવસમાં દોઢ લાખ મણથી વધુ જણસીની આવક થઈ હતી.
યાર્ડમાં હાલના બજાર ભાવ ખેડૂતો માટે ખુશી લાવ્યા છે. જાડી મગફળીના ભાવ પ્રતિ મણ દીઠ ₹750થી ₹1200 સુધીના ઉપજી રહ્યા છે. જ્યારે કપાસના ભાવ ₹1221થી ₹1560, જીરુંના ₹3150થી ₹3450, તલના ₹1470થી ₹2013 અને સોયાબીનના ₹580થી ₹856 સુધીના ભાવ મળી રહ્યા છે.
બમ્પર પાક અને સારા ભાવોનું આ સંયોજન ખેડૂતો માટે દિવાળી પૂર્વેની મોટી ખુશી લઈને આવ્યું છે, જે તેમના તહેવારોને વધુ રંગીન બનાવશે.
