વડોદરા: ગોરવામાં નશામાં ધૂત બાઈક ચાલકે મહિલાને ઉડાવી
ગોરવામાં નશામાં ધૂત બાઈક ચાલકે મહિલાને અડફેટે લીધી: ધરપકડ
વડોદરા શહેરના ગોરવા વિસ્તારમાં ફરી એકવાર નશામાં ધૂત વાહનચાલકે અકસ્માત સર્જ્યો છે. ૪ માર્ચની રાત્રે મધુનગર રોડ પર બનેલી આ ઘટનામાં એક મહિલા ગંભીર રીતે ઇજાગ્રસ્ત થઇ છે. કરોડિયા રોડ પર રહેતા ૩૩ વર્ષીય રીનાબેન વસાવા રાત્રે વોકિંગ માટે નીકળ્યા હતા. જ્યારે તેઓ મધુનગર પાસેથી રોડ ક્રોસ કરીને પરત ફરી રહ્યા હતા, ત્યારે પાછળથી પૂરઝડપે આવી રહેલા એક બાઈક ચાલકે રીનાબેનને જોરદાર ટક્કર મારી હતી.
ટક્કર એટલી જોરદાર હતી કે રીનાબેન હવામાં ફંગોળાઈને રોડ પર પટકાયા હતા. આ અકસ્માતમાં તેમને માથાના કપાળના ભાગે, ડાબી આંખની પાંપણ પર અને નાકના ભાગે ગંભીર ઈજાઓ થઈ હતી. બનાવની જાણ થતા જ તેમના પતિ હિતેશભાઈ અને સોસાયટીના લોકો દોડી આવ્યા હતા. રીનાબેનને તાત્કાલિક સારવાર માટે ગોત્રી જનરલ હોસ્પિટલ ખસેડવામાં આવ્યા હતા, જ્યાં હાલ તેમની સારવાર ચાલી રહી છે.
ઘટનાસ્થળે હાજર લોકોએ અકસ્માત સર્જનાર બાઈક ચાલકને પકડી લીધો હતો, જેની ઓળખ વિવેક શેરબહાદુર શ્રીવાસ્તવ તરીકે થઈ હતી. આરોપી વિવેક દારૂના નશામાં એટલો ગળાડૂબ હતો કે તેને સરખું ઉભા રહેવાનું પણ ભાન નહોતું. પોલીસ જ્યારે તેને પકડવા પહોંચી ત્યારે તેણે કેફી હાલતમાં બબડાટ શરૂ કર્યો હતો કે, “અરે યાર, મારો હાથ તો પકડો! મારા માથા પર થોડું પાણી નાખી આપો, મારી આંખ ખુલે પછી જે કરવું હોય તે કરજો.”
ગોરવા પોલીસે આરોપીની ધરપકડ કરી તેની સામે આઈપીસીની કલમો અને પ્રોહિબિશન એક્ટ હેઠળ ગુનો દાખલ કર્યો છે. પોલીસની પ્રાથમિક તપાસમાં બહાર આવ્યું છે કે આરોપીએ કાયદાનો જરા પણ ડર રાખ્યા વિના નશાની હાલતમાં વાહન ચલાવી નિર્દોષ મહિલાનો જીવ જોખમમાં મૂક્યો હતો. હાલ પોલીસ આ મામલે કડક કાર્યવાહી કરી રહી છે જેથી ભવિષ્યમાં આવા કિસ્સા અટકે.
