સ્પાઇન ઇન્સ્ટિટ્યૂટમાં ONGCની મદદથી નવા સાધનો

આરોગ્ય મંત્રીએ સ્પાઇન ઇન્સ્ટિટ્યૂટ માં P&O સાધનો કર્યા લોકાર્પિત

અમદાવાદની ગવર્મેન્ટ (CL&SC) સ્પાઇન ઇન્સ્ટિટ્યૂટ, સિવિલ હોસ્પિટલ ખાતે આરોગ્ય મંત્રી શ્રી પ્રફુલ પાનસેરીયા સાહેબ અને સાથી મંત્રી શ્રીમતી દર્શનાબેન વાઘેલાએ પ્રોસ્થેટિક્સ અને ઓર્થોટિક્સ (P&O) વિભાગ માટેના આધુનિક સાધનોનું ભવ્ય લોકાર્પણ કર્યું.

ONGCનો સરાહનીય સહયોગ

આ અત્યાધુનિક સાધનોની ખરીદી માટે ઓઇલ એન્ડ નેચરલ ગેસ કોર્પોરેશન (ONGC) દ્વારા તેમની સામાજિક જવાબદારી (CSR) હેઠળ આર્થિક સહયોગ આપવામાં આવ્યો છે. આરોગ્ય મંત્રી શ્રી પ્રફુલ પાનસેરીયાએ ONGCના આ ઉમદા કાર્યને બિરદાવતા, નિરાધાર અને જરૂરિયાતમંદ દર્દીઓની સારવારમાં આ સહયોગ મહત્ત્વપૂર્ણ સાબિત થશે તેમ જણાવ્યું હતું.

સારવાર બનશે વધુ સચોટ અને ઝડપી

આ નવા ઉમેરાયેલા અત્યાધુનિક સાધનોને કારણે સંસ્થાના P&O વિભાગની કાર્યક્ષમતામાં ધરખમ વધારો થશે. પ્રોસ્થેટિક્સ અને ઓર્થોટિક્સ વિભાગ કૃત્રિમ અંગો બનાવવાનું અને વિકલાંગતા ધરાવતા દર્દીઓ માટે સહાયક ઉપકરણો તૈયાર કરવાનું કામ કરે છે. હવે આ કામગીરી વધુ સચોટ, ઝડપી અને ગુણવત્તાયુક્ત બનશે.

આનો સીધો લાભ અહીં સારવાર લેતા હજારો દર્દીઓને મળશે. જેમને હવે કૃત્રિમ અંગો અથવા ઓર્થોટિક ઉપકરણો માટે લાંબો સમય રાહ જોવી પડશે નહીં અને તેમને ઝડપથી રાહત મળશે.

જનતા માટે ઉત્તમ આરોગ્ય સેવાઓ

આ લોકાર્પણ પ્રસંગે મંત્રીશ્રીએ જણાવ્યું હતું કે, ગુજરાત સરકાર રાજ્યના દરેક નાગરિકને શ્રેષ્ઠ અને આધુનિક આરોગ્ય સેવાઓ પૂરી પાડવા કટિબદ્ધ છે. સરકારી સંસ્થાઓમાં આ પ્રકારના આધુનિકીકરણથી સામાન્ય અને ગરીબ વર્ગના લોકોને મોંઘી સારવાર વિના મૂલ્યે અથવા રાહત દરે મળી રહેશે. આ સેવાથી શારીરિક વિકલાંગતા ધરાવતા દર્દીઓનું જીવન ધોરણ સુધરશે અને તેઓ ફરી આત્મનિર્ભર બની શકશે.

સમાચાર માટે જોડાઓ અમારા WhatsApp ગ્રુપ સાથે https://whatsapp.com/channel/0029Vb6fknQ89inqYaFp2b3l