વડોદરાના મિથિલેશનું ‘કવચ’: ડ્રિન્ક એન્ડ ડ્રાઇવ એલર્ટ
‘કવચ’: ડ્રિન્ક એન્ડ ડ્રાઇવ રોકવા વડોદરાના યુવાનનું ડિવાઇસ
વડોદરા: ગુજરાતભરમાં ડ્રિન્ક એન્ડ ડ્રાઇવના કારણે થતા માર્ગ અકસ્માતોની સંખ્યા સતત વધી રહી છે, જેમાં અનેક નિર્દોષ લોકો પોતાનો જીવ ગુમાવે છે.
તાજેતરમાં દિવાળી પર્વ દરમિયાન વડોદરામાં દારૂના નશામાં વાહન ચાલકોએ સર્જેલા હિટ એન્ડ રનના કેસોએ સમગ્ર રાજ્યને હચમચાવી દીધું હતું, જેમાં 4 વર્ષના બાળકનું કરુણ મૃત્યુ થયું હતું. આવી ગંભીર પરિસ્થિતિ વચ્ચે વડોદરાના એક યુવા ઈનોવેટર મિથિલેશ પટેલે એક ક્રાંતિકારી ઉપકરણ તૈયાર કર્યું છે, જેનું નામ છે ‘કવચ’.
આ ‘કવચ’ ડિવાઇસ કાર સહિત અન્ય વાહનોમાં લગાવી શકાય છે અને તે ડ્રિન્ક એન્ડ ડ્રાઇવના કારણે થતા અકસ્માતોને અસરકારક રીતે ટાળી શકશે. મિથિલેશ પટેલે જણાવ્યું કે, “રોજ સમાચારમાં ડ્રિન્ક એન્ડ ડ્રાઇવના કેસ અને તેમાં થતા અકસ્માતોથી પ્રેરિત થઈને મેં આ ડિવાઇસ બનાવ્યું છે.”
‘કવચ’ કેવી રીતે કામ કરશે?
આ ડિવાઇસમાં આલ્કોહોલ ડિટેક્શન સેન્સર લગાવવામાં આવ્યું છે. આ સિસ્ટમ દર 15 સેકન્ડે ડ્રાઇવરના શરીરને સ્કેન કરે છે. જો શરીરમાં આલ્કોહોલનું પ્રમાણ સામાન્ય (300-350 લેવલ) કરતા વધે તો નીચે મુજબની કાર્યવાહી થશે:
- એલર્ટ: આલ્કોહોલનું પ્રમાણ વધતાં ડિવાઇસમાં યલો લાઈટ એલર્ટ ચાલુ થશે.
- હાઇ એલર્ટ અને કટ-ઓફ: જો આલ્કોહોલનું લેવલ 450થી ઉપર જાય (જેને ‘હાઈલી આલ્કોહોલિક લેવલ’ માનવામાં આવે છે) તો ડિવાઇસમાં રેડ લાઈટ એલર્ટ ચાલુ થઈ જશે. આ સાથે જ, આ ડિવાઇસ વાહનની એક્સેસ સિસ્ટમને કટ-ઓફ કરી નાંખશે, જેથી વાહન આગળ ચાલી શકશે નહીં.
- ઓથોરિટીને જાણ: સૌથી અગત્યની વાત એ છે કે, આલ્કોહોલનું લેવલ વધતાની સાથે જ ‘કવચ’ દ્વારા તેમાં નોંધાયેલા ઓથોરિટીના ઈ-મેઇલ એડ્રેસ પર આલ્કોહોલ લેવલના ફિગર સાથેનો ઈ-મેઇલ મોકલી દેવામાં આવશે, જેનાથી ડ્રાઇવરની ઓળખ અને સ્થિતિ તુરંત જાણી શકાશે.
વ્યાપક ઉપયોગની સંભાવના
મિથિલેશ પટેલ, જેમની પાસે હાલમાં 120 જેટલી પેટન્ટ અને 20 કોપીરાઇટ છે, તેમણે જણાવ્યું કે આ ડિવાઇસનો ઉપયોગ માત્ર ખાનગી કારોમાં જ નહીં, પરંતુ પોલીસની PCR વાન, સરકારી બસો, સ્કૂલ બસો અને તો ડ્રોનમાં લગાવીને દારૂના અડ્ડાઓને સ્કેન કરવા માટે પણ થઈ શકે છે. ઉપરાંત, કોર્પોરેટ ઓફિસોમાં કર્મચારીઓને ડ્રિન્ક કરીને આવતા રોકવા માટે પણ ‘કવચ’ ઉપયોગી સાબિત થશે. તેમણે સરકારને આ ટેક્નોલોજીને માર્કેટમાં લાવવા માટે પ્લેટફોર્મ પૂરું પાડવા વિનંતી કરી છે, જેથી લોકોના જીવ બચાવી શકાય.
ઉદાહરણ: વડોદરામાં અગાઉ બનેલી રક્ષિત કાંડ જેવી ઘટનાઓ અને તાજેતરના હિટ એન્ડ રનની ઘટનાઓ દર્શાવે છે કે, આવા ડિવાઇસની તાતી જરૂરિયાત છે. ‘કવચ’ ભવિષ્યમાં આવા અકસ્માતોને રોકવામાં ગેમ-ચેન્જર સાબિત થઈ શકે છે.
દૈનિક પલના તમામ સમાચાર માટે જોડાઓ અમારા WhatsApp ગ્રુપ સાથે https://whatsapp.com/channel/0029Vb6fknQ89inqYaFp2b3l
