ન્યૂઝીલેન્ડ ફાઈનલમાં: ફિન એલને તોડ્યો ક્રિસ ગેલનો રેકોર્ડ
T20 વર્લ્ડ કપ: ફિન એલનની ઐતિહાસિક સદી, ન્યૂઝીલેન્ડ ફાઈનલમાં
કોલકાતા: બુધવારે કોલકાતાના ઈડન ગાર્ડન્સ સ્ટેડિયમમાં રમાયેલી T20 વર્લ્ડ કપની પ્રથમ સેમિફાઈનલમાં ન્યૂઝીલેન્ડે એકતરફી મુકાબલામાં સાઉથ આફ્રિકાને માત આપી છે. આ જીત સાથે જ કિવી ટીમ બીજી વખત આ પ્રતિષ્ઠિત ટૂર્નામેન્ટની ફાઈનલમાં પહોંચી ગઈ છે. ન્યૂઝીલેન્ડની આ જીતના ખરા હીરો ઓપનર ફિન એલન રહ્યા હતા, જેમણે ઈતિહાસ રચી દીધો છે.
ન્યૂઝીલેન્ડના કેપ્ટન મિચેલ સેન્ટનરે ટોસ જીતીને પ્રથમ બોલિંગ કરવાનો નિર્ણય લીધો હતો. સાઉથ આફ્રિકાના બેટર્સ શરૂઆતથી જ દબાણમાં જોવા મળ્યા હતા, તેમ છતાં ટીમે લડાયક સ્કોર બનાવતા 20 ઓવરમાં 8 વિકેટે 169 રન બનાવ્યા હતા. કિવી બોલરોએ ડેથ ઓવર્સમાં શાનદાર નિયંત્રણ રાખ્યું હતું.
170 રનના લક્ષ્યાંકનો પીછો કરવા ઉતરેલી ન્યૂઝીલેન્ડની શરૂઆત આક્રમક રહી હતી. ફિન એલન આજે અલગ જ મૂડમાં હતા. તેમણે સાઉથ આફ્રિકાના તમામ મુખ્ય બોલરોની લાઇન-લેન્થ બગાડી નાખી હતી. એલને માત્ર 33 બોલમાં પોતાની સદી પૂરી કરી હતી. આ T20 વર્લ્ડ કપના ઇતિહાસની સૌથી ઝડપી સદી છે. આ અગાઉ આ રેકોર્ડ વેસ્ટ ઇન્ડીઝના ‘યુનિવર્સ બોસ’ ક્રિસ ગેલના નામે હતો, જેમણે 2016માં 47 બોલમાં સદી ફટકારી હતી. એલનની આ ઇનિંગમાં ચોગ્ગા અને છગ્ગાની સુનામી જોવા મળી હતી.
ન્યૂઝીલેન્ડે આ લક્ષ્યાંક કોઈ પણ પ્રકારના સંઘર્ષ વગર માત્ર 12.5 ઓવરમાં જ પ્રાપ્ત કરી લીધો હતો. કિવી ટીમે માત્ર એક વિકેટ ગુમાવીને 170 રન બનાવી મેચ પોતાના નામે કરી હતી. ન્યૂઝીલેન્ડ અગાઉ 2021ની ફાઈનલમાં પહોંચ્યું હતું. હવે આ ટીમ બીજી વખત ટ્રોફીથી માત્ર એક ડગલું દૂર છે. ફિન એલનની આ વિસ્ફોટક બેટિંગે અન્ય ટીમો માટે પણ ખતરાની ઘંટી વગાડી દીધી છે. ઈડન ગાર્ડન્સમાં હાજર હજારો દર્શકોએ એલનની આ ઐતિહાસિક ઇનિંગને ઉભા થઈને વધાવી લીધી હતી.
