MSU પદવીદાન સમારોહની તારીખ જાહેર કરો: ABVPની ત્વરિત માંગ
મ.સ.યુનિવર્સિટીમાં પદવીદાન સમારોહ અનિયમિત: ABVPની ત્વરિત તારીખ જાહેર કરવાની માંગણી
વડોદરા. મહારાજા સયાજીરાવ યુનિવર્સિટી (MSU) માં છેલ્લા ચાર વર્ષથી પદવીદાન સમારોહનું આયોજન અનિયમિત થઈ રહ્યું છે, જેના કારણે હજારો વિદ્યાર્થીઓને તેમની ડિગ્રી મેળવવામાં વિલંબનો સામનો કરવો પડી રહ્યો છે. આ વર્ષે પણ શૈક્ષણિક સત્રનો મોટો ભાગ વીતી ગયો હોવા છતાં, યુનિવર્સિટી સત્તાધીશો દ્વારા હજી સુધી પદવીદાન સમારોહની તારીખ જાહેર કરવામાં આવી નથી.
યુનિવર્સિટીની આ અનિયમિતતા સામે અખિલ ભારતીય વિદ્યાર્થી પરિષદ (ABVP) એ સખત વિરોધ વ્યક્ત કર્યો છે અને ત્વરિત પગલાં લેવાની માંગ કરી છે. ABVPના પ્રતિનિધિઓએ યુનિવર્સિટીના કુલપતિ અને સત્તાધીશો સમક્ષ લેખિતમાં રજૂઆત કરી જણાવ્યું હતું કે, “ચાર વર્ષથી પદવીદાન સમારોહ નિયમિતપણે ન યોજાવાથી વિદ્યાર્થીઓના ભવિષ્ય અને ઉચ્ચ અભ્યાસમાં અવરોધ ઊભો થાય છે. નોકરી કે વિદેશ અભ્યાસ માટે તાત્કાલિક ડિગ્રીની જરૂર હોય તેવા વિદ્યાર્થીઓને સૌથી વધુ હાલાકી ભોગવવી પડે છે.”
ABVP એ ભારપૂર્વક માંગ કરી છે કે યુનિવર્સિટી વહીવટીતંત્ર વિદ્યાર્થીઓના હિતને ધ્યાનમાં રાખીને તાત્કાલિક ધોરણે પદવીદાન સમારોહની તારીખ જાહેર કરે અને વહેલી તકે તેનું આયોજન કરે. જો ત્વરિત નિર્ણય નહીં લેવાય તો ABVP દ્વારા વિદ્યાર્થી હિતમાં આંદોલનાત્મક કાર્યક્રમો આપવાની ચીમકી પણ ઉચ્ચારવામાં આવી છે. વિદ્યાર્થીઓ અને વાલીઓએ પણ આ મુદ્દે વહેલી તકે નિરાકરણ આવે તેવી આશા વ્યક્ત કરી છે.
