MSU કોમર્સ ફેકલ્ટીમાં ‘અર્થરંગ 2026’ ફેસ્ટનો ભવ્ય પ્રારંભ
MSU કોમર્સ ફેકલ્ટીમાં 5 વર્ષ બાદ અર્થરંગ 2026 ફેસ્ટ શરૂ થયો
વડોદરાની મહારાજા સયાજીરાવ યુનિવર્સિટીની કોમર્સ ફેકલ્ટીમાં પાંચ વર્ષના લાંબા પ્રતીક્ષા બાદ ‘અર્થરંગ 2026’ ફેસ્ટની શાનદાર શરૂઆત થઈ છે. આ મહોત્સવ 9 માર્ચથી 13 માર્ચ 2026 દરમિયાન યોજાઈ રહ્યો છે, જેણે યુનિવર્સિટીના કેમ્પસમાં ફરી એકવાર નવી ઉર્જા અને ઉત્સાહ ભરી દીધો છે. શૈક્ષણિક પ્રવૃત્તિઓની સાથે વિદ્યાર્થીઓના વ્યક્તિત્વ વિકાસ માટે આ ફેસ્ટ એક પાયાનું પ્લેટફોર્મ પૂરું પાડી રહ્યો છે.
‘અર્થરંગ 2026’નો મુખ્ય ઉદ્દેશ્ય વિદ્યાર્થીઓમાં છુપાયેલી સુષુપ્ત પ્રતિભાને બહાર લાવવાનો અને તેમને આત્મવિશ્વાસ, ટીમવર્ક તથા નેતૃત્વ જેવા કૌશલ્યોથી સજ્જ કરવાનો છે. ફેસ્ટના પ્રથમ દિવસે જ વિવિધ રસપ્રદ સ્પર્ધાઓનું આયોજન કરવામાં આવ્યું હતું. જેમાં વન મિનિટ ચેલેન્જ, ફાયરલેસ કુકિંગ, મૉક્ટેલ મેકિંગ જેવી ખાણી-પીણીની સ્પર્ધાઓથી લઈને બેસ્ટ આઉટ ઓફ વેસ્ટ, ગિફ્ટ રેપિંગ, ટી-શર્ટ/કુર્તા પ્રિન્ટિંગ, રંગોળી અને મેહંદી જેવી કલાત્મક સ્પર્ધાઓનો સમાવેશ થયો હતો. વિદ્યાર્થીઓએ દરેક સ્પર્ધામાં પોતાની અનોખી વિચારસરણી અને કલાત્મકતાનું ઉત્કૃષ્ટ પ્રદર્શન કર્યું હતું.
કોમર્સ ફેકલ્ટીના વિદ્યાર્થીઓમાં આ ફેસ્ટને લઈને ભારે ક્રેઝ જોવા મળી રહ્યો છે. વિદ્યાર્થીઓના મતે, પાંચ વર્ષના લાંબા અંતરાલ બાદ આવા કાર્યક્રમો ફરી શરૂ થવાથી તેમને મનોરંજનની સાથે પોતાની કુશળતા સાબિત કરવાની તક મળી છે. આ માત્ર સ્પર્ધા પૂરતું સીમિત નથી, પરંતુ શૈક્ષણિક વાતાવરણમાં એક તાજગી લાવનારો પ્રસંગ બની રહ્યો છે. વિદ્યાર્થીઓને નવા મિત્રો બનાવવાની અને જૂના મિત્રો સાથે યાદગાર ક્ષણો માણવાની પણ તક મળી છે. 13 માર્ચ સુધી ચાલનારા આ ફેસ્ટમાં હજુ પણ અનેક સાંસ્કૃતિક અને મનોરંજક કાર્યક્રમો યોજાશે, જે MSU કોમર્સ ફેકલ્ટીના વિદ્યાર્થીઓના સર્વાંગી વિકાસમાં મહત્વનું યોગદાન આપશે.
