રાજકોટ રેસકોર્સ પર રંગ અને રોશનીભર્યા દિવાળી ઉત્સવનો આવતીકાલથી પ્રારંભ
રાજકોટનો રેસકોર્સ રીંગ રોડ ઝગમગશે: આવતીકાલ સાંજથી રંગ અને રોશનીભર્યા દિવાળી ઉત્સવનો પ્રારંભ
રાજકોટ: તહેવારોના માહોલમાં શહેરના નાગરિકોને એક અદ્ભુત અનુભવ આપવા માટે રાજકોટના રેસકોર્સ રીંગ રોડ પર આવતીકાલ સાંજથી ભવ્ય દિવાળી ઉત્સવ અને રંગોળી ઉત્સવનો પ્રારંભ થવા જઈ રહ્યો છે. આ ઉત્સવને લઈને સમગ્ર રીંગ રોડને રોશની અને સુશોભનથી શણગારવામાં આવ્યો છે.
તૈયારીઓના ભાગરૂપે, કિસાનપરા ચોકથી પોલીસ હેડ કવાર્ટર અને જિલ્લા પંચાયત ચોક સુધીનો એક તરફનો રીંગ રોડ અવનવી લાઇટિંગ્સ, આકર્ષક ગેટ, ડોમ જેવા મંડપ અને બલૂન્સના સુશોભનથી સજ્જ કરવામાં આવ્યો છે. ખાસ કરીને કિસાનપરા ચોકનો એન્ટ્રી ગેટ મુલાકાતીઓ માટે મુખ્ય આકર્ષણનું કેન્દ્ર બન્યો છે. આ સ્થળે ડી.જે. મ્યુઝિક સહિતની મનોરંજનની વ્યવસ્થાઓ પણ કરવામાં આવી છે.
આવતીકાલ સાંજથી શરૂ થતો આ ઉત્સવ દિવાળી સુધી ચાલશે, જેમાં શહેરની જનતા રોશનીભર્યા વાતાવરણ વચ્ચે ઉત્સવનો આનંદ માણી શકશે. આયોજકોના જણાવ્યા મુજબ, દિવાળીના તહેવારને અનુલક્ષીને આ વિસ્તાર સાંસ્કૃતિક પ્રવૃત્તિઓ અને પારિવારિક મનોરંજનનું કેન્દ્ર બની રહેશે.
તસવીરોમાં પણ રીંગ રોડ પર ઉભા કરાયેલા મંડપ અને લાઇટિંગ્સની ભવ્યતા નજરે પડે છે. તંત્ર દ્વારા આ ઉત્સવ માટે જરૂરી તમામ વ્યવસ્થાઓ પૂર્ણ કરી દેવામાં આવી છે અને આવતીકાલ સાંજથી પૂરો રેસકોર્સ રીંગ રોડ ઝગમગી ઉઠશે, જેનાથી દિવાળીની ખરી રોનક જોવા મળશે.
રિપોર્ટ: હાર્દિક ચંદારાણા
