રાજકોટ બાલાજી હનુમાનજી મંદિરે નોટ શણગાર: ધનતેરસની ભીડ
ધનતેરસ-શનિવારના પાવન સંયોગે રાજકોટના બાલાજી હનુમાનજી મંદિરે ચલણી નોટોનો દિવ્ય શણગાર
રાજકોટ: દિવાળીના પર્વની શરૂઆત સાથે જ ધાર્મિક સ્થળો પર ભક્તિનો માહોલ જામ્યો છે. આજે ધનતેરસ અને શનિવારના પવિત્ર સંયોગે શહેરના ગૌરવ સમા શ્રી બાલાજી હનુમાનજી મંદિરે દાદાને અનોખો શણગાર કરવામાં આવ્યો છે. મહાપ્રતાપી બાલાજી હનુમાનજી મહારાજને ચલણી નોટોનો દિવ્ય અને અલૌકિક શણગાર કરવામાં આવતાં ભક્તોમાં ઉત્સાહનો માહોલ સર્જાયો છે.
ધનતેરસના દિવસે લક્ષ્મીજીની કૃપા પ્રાપ્ત થાય તે હેતુથી દાદાના શણગારમાં નોટોનો ઉપયોગ કરાયો હતો, જેના દર્શન માટે સવારથી જ ભક્તોની લાંબી કતારો જોવા મળી હતી. મોટી સંખ્યામાં શ્રદ્ધાળુઓએ દાદાના આ દિવ્ય સ્વરૂપના દર્શન કરીને ધન્યતા અનુભવી હતી.
આજના શુભ દિવસે સાંજે હનુમાનજી મહારાજની થનારી રાજોપચાર પૂજનથી સંધ્યા આરતીનું વિશેષ આયોજન કરવામાં આવ્યું છે. આ પવિત્ર આરતીમાં હજારો ભક્તો જોડાશે તેવી શક્યતા છે. રાજોપચાર પૂજન દ્વારા દાદાની આરાધના કરવામાં આવે છે, જે શનિદોષમાંથી મુક્તિ અને ધનતેરસના દિવસે સમૃદ્ધિના આશીર્વાદ આપે છે. મંદિરના આચાર્યશ્રીએ જણાવ્યું હતું કે આ સંયોગ ખૂબ જ શુભ છે અને દાદાની કૃપાથી સૌના જીવનમાં સુખ-સમૃદ્ધિ આવે તેવી પ્રાર્થના કરવામાં આવી હતી.
