ગાંધીનગર: બાલાજી મંદિરની નિઃશુલ્ક સ્કૂલ અંગે મહત્વની બેઠક
ગાંધીનગર: બાલાજી મંદિરની સ્કૂલ મુદ્દે મંત્રીઓ સાથે બેઠક
ગાંધીનગર: રાજ્યમાં શિક્ષણના સ્તરને ઊંચું લાવવા અને છેવાડાના માનવી સુધી શિક્ષણ પહોંચાડવા માટે ધાર્મિક સંસ્થાઓનું યોગદાન હંમેશા મહત્વનું રહ્યું છે. આ પરંપરાને આગળ ધપાવતા, બાલાજી હનુમાન મંદિર ખાતે નવીનીકરણ પામેલી નિઃશુલ્ક સ્કૂલના પ્રોજેક્ટને લઈને આજે ગાંધીનગર સચિવાલયમાં એક ઉચ્ચસ્તરીય બેઠકનું આયોજન કરવામાં આવ્યું હતું.
કોણ કોણ ઉપસ્થિત રહ્યું? આ બેઠકમાં ગુજરાત પ્રદેશ ભાજપના અગ્રણી ચેતનભાઈ રામાણીની આગેવાનીમાં સ્વામી રાધારમણદાસજી અને વિવેકસાગરદાસજી સચિવાલય પહોંચ્યા હતા. તેમણે રાજ્ય સરકારના કેબિનેટ અને રાજ્યકક્ષાના મંત્રીઓ સાથે સ્કૂલના વિકાસ અંગે પરામર્શ કર્યો હતો. સામે પક્ષે સરકાર તરફથી શિક્ષણમંત્રી પ્રદ્યુમન વાજા, રોજગારમંત્રી કાંતિભાઈ અમૃતિયા, કાયદામંત્રી કૌશિકભાઈ વેકરીયા અને હાયર એજ્યુકેશન મંત્રી ત્રિકમભાઈ છાંગાએ સંતોનું સ્વાગત કરી ચર્ચામાં ભાગ લીધો હતો.
શિક્ષણ અને સેવાનો સમન્વય નિઃશુલ્ક શિક્ષણ જેવી ઉમદા પ્રવૃત્તિને પ્રોત્સાહન આપવા માટે યોજાયેલી આ મુલાકાતમાં જનપ્રતિનિધિઓ પણ મોટી સંખ્યામાં હાજર રહ્યા હતા. અમદાવાદ પશ્ચિમના સાંસદ દિનેશભાઈ મકવાણા, મણિનગરના ધારાસભ્ય અમૂલભાઈ ભટ્ટ અને વાઘોડિયાના ધારાસભ્ય ધર્મેન્દ્રસિંહ વાઘેલાએ પણ પોતાની ઉપસ્થિતિ નોંધાવી હતી.
મંત્રીમંડળ અને સંતો વચ્ચેની આ મુલાકાતનો મુખ્ય ઉદ્દેશ્ય બાલાજી હનુમાન મંદિર દ્વારા ચાલતી શૈક્ષણિક પ્રવૃત્તિઓને વધુ સુદ્રઢ બનાવવાનો હતો. નિઃશુલ્ક સ્કૂલના માધ્યમથી ગરીબ અને મધ્યમ વર્ગના બાળકોને ગુણવત્તાયુક્ત શિક્ષણ મળી રહે તે માટે સરકાર અને સંસ્થા કઈ રીતે સાથે મળીને કામ કરી શકે તે અંગે ગંભીર વિચારણા કરવામાં આવી હતી. આ મુલાકાત શિક્ષણ ક્ષેત્રે સરકાર અને સામાજિક સંસ્થાઓની ભાગીદારીનું ઉત્તમ ઉદાહરણ પૂરું પાડે છે.
