અમરેલી: ગુનેગાર વિજય ઉર્ફે ડીગ્રી સાડમીયા પાસા હેઠળ જેલમાં
અમરેલીમાં મિલકત સંબંધી ગુના આચરતો રીઢો ગુનેગાર પાસા હેઠળ જેલભેગો
અમરેલી પાસા હેઠળ: ભાવનગર રેન્જ આઈ.જી.પી. ગૌતમ પરમાર દ્વારા જિલ્લાઓમાં જાણીતા ગુનેગારો અને અસામાજિક તત્વો સામે પાસા અને તડીપાર જેવા કડક કાયદા હેઠળ પગલાં લેવાની સૂચના આપવામાં આવી છે. આ સૂચનાના અનુસંધાને અમરેલી પોલીસ અધિક્ષક સંજય ખરાતે જિલ્લામાં ચોરી અને લૂંટ જેવા મિલકત સંબંધી ગુનાઓ આચરતા તત્વો સામે કડક હાથે કાર્યવાહી કરવા માર્ગદર્શન પૂરું પાડ્યું હતું.
આ અભિયાન અંતર્ગત અમરેલી એલ.સી.બી. પોલીસ ઇન્સ્પેક્ટર એ.ડી. ચાવડા અને તેમની ટીમે વિજય ઉર્ફે વિપુલ ઉર્ફે ડીગ્રી છગનભાઈ સાડમીયા (ઉંમર વર્ષ ૨૨, રહે. વાવડા, તા. બાબરા) વિરુદ્ધ કાર્યવાહી હાથ ધરી હતી. આ આરોપીનો ગુનાહિત ઇતિહાસ તપાસતા માલૂમ પડ્યું હતું કે, વર્ષ ૨૦૨૫ દરમિયાન જ તેની વિરુદ્ધ રાજકોટ જિલ્લાના ગોંડલ સીટી બી ડિવિઝનમાં બે કેસ, સાવરકુંડલા ટાઉન પોલીસ મથકે એક કેસ, જામનગરના જામજોધપુરમાં એક કેસ અને જૂનાગઢના ભેંસાણ પોલીસ મથકે એક કેસ એમ કુલ ૫ ગુનાઓ મિલકત સંબંધી કલમો હેઠળ નોંધાયેલા છે.
લોકોની માલ-મિલકત જેના કારણે જોખમમાં મુકાઈ શકે તેવી આ શખ્સની સમાજ-વિરોધી પ્રવૃત્તિઓ પર અંકુશ લાવવો અનિવાર્ય જણાતા, એલ.સી.બી. દ્વારા પાસાની દરખાસ્ત તૈયાર કરી જિલ્લા મેજિસ્ટ્રેટ તરફ મોકલવામાં આવી હતી. અમરેલી જિલ્લા મેજિસ્ટ્રેટ વિકલ્પ ભારદ્વાજે આરોપી વિરુદ્ધ પાસાનું વોરંટ ઇસ્યુ કરતા, એલ.સી.બી. ટીમ દ્વારા વિજય ઉર્ફે ડીગ્રી સાડમીયાને પાસા વોરંટની બજવણી કરવામાં આવી હતી. ત્યારબાદ તેને તાત્કાલિક અસરથી મહેસાણા જિલ્લા જેલ ખાતે અટકાયતમાં રહેવા માટે રવાના કરી દેવામાં આવ્યો છે.
આ કામગીરીમાં એલ.સી.બી.ના પોલીસ કોન્સ્ટેબલ રમેશભાઈ સીસારા, દયાબેન જસાણી, ધ્રુવિનાબેન સુરાણી અને રીનાબેન ધોળકીયા જોડાયા હતા. અમરેલી પોલીસની આ કડક કાર્યવાહીએ જિલ્લામાં કાયદો અને વ્યવસ્થા જાળવવાની દિશામાં મહત્વનું સોપાન સર કર્યું છે અને ગુનેગારોમાં ફફડાટ ફેલાવ્યો છે.
