રાજકોટ: પક્ષ કહેશે તો ફરી સક્રિય થઈશ: અંજલીબેન રૂપાણી
રાજકોટ: ભાજપ કહેશે તો સક્રિય થઈશ, અંજલીબેનનું મોટું નિવેદન
રાજકોટ ના રાજકારણમાં આજે એક મહત્વપૂર્ણ ઘટનાક્રમે ભારે ગરમાવો લાવી દીધો છે. ભાજપના રાષ્ટ્રીય મહામંત્રી બી.એલ. સંતોષ, પ્રદેશ અધ્યક્ષ જગદીશ વિશ્વકર્મા અને સંગઠન મહામંત્રી રત્નાકરજીએ આજે રાજકોટ ખાતે દિવંગત પૂર્વ મુખ્યમંત્રી વિજયભાઈ રૂપાણીના નિવાસસ્થાને જઈને તેમના ધર્મપત્ની અંજલીબેન રૂપાણી સાથે મુલાકાત કરી હતી. ગત ૧૨ જૂનના રોજ અમદાવાદમાં થયેલી વિમાન દુર્ઘટનામાં વિજયભાઈના નિધન બાદ, ભાજપના શીર્ષ નેતૃત્વની આ પ્રથમ મુલાકાત હોવાથી રાજકીય વર્તુળોમાં અનેક તર્ક-વિતર્કો શરૂ થયા છે.
આ મુલાકાત બાદ અંજલીબેન રૂપાણીએ મીડિયા સાથેની વાતચીતમાં એક મહત્વપૂર્ણ સંકેત આપ્યો હતો. તેમણે સ્પષ્ટ શબ્દોમાં જણાવ્યું હતું કે, “હું ભાજપની કાર્યકર્તા છું. જો પક્ષ દ્વારા સૂચના આપવામાં આવશે, તો હું ચોક્કસ સંગઠનમાં ફરી સક્રિય થઈશ.” અંજલીબેનના આ નિવેદનને સૌરાષ્ટ્રના રાજકારણ માટે ખૂબ જ સૂચક માનવામાં આવી રહ્યું છે.
સૂત્રોના જણાવ્યા અનુસાર, સૌરાષ્ટ્રમાં ભાજપનું સંગઠન ધીમે-ધીમે નબળું પડી રહ્યું છે અને રાજકોટમાં જૂથવાદ વકર્યો છે. સ્થાનિક સ્વરાજ્યની ચૂંટણીઓ નજીક આવી રહી છે ત્યારે પક્ષને મજબૂત નેતૃત્વની જરૂર છે. વિજયભાઈ રૂપાણીએ વર્ષો સુધી સંગઠનને મજબૂત કરવા પરસેવો પાડ્યો હતો. તેમની ખોટ પૂરવા અને પક્ષમાં નવો પ્રાણ ફૂંકવા માટે ભાજપ હાઈકમાન્ડ હવે અંજલીબેન રૂપાણીને ફરી સક્રિય કરવાના મૂડમાં હોય તેવું લાગી રહ્યું છે. બી.એલ. સંતોષની આ મુલાકાત માત્ર સાંત્વના પૂરતી સીમિત ન રહેતા, આગામી રાજકીય રણનીતિનો ભાગ હોવાની પ્રબળ શક્યતાઓ સેવાઈ રહી છે.
