પાલીતાણા: લાખોના ખર્ચે બનેલું વિશ્રામ ગૃહ હવે બન્યું ખંડેર
પાલીતાણા વિશ્રામ ગૃહની દયનીય હાલત: જનતાના પૈસા પાણીમાં
પાલીતાણામાં પ્રશાસનની શરમજનક નિષ્ફળતા ફરી એકવાર સામે આવી છે. શહેરનું ક્યારેક શાન ગણાતું સરકારી વિશ્રામ ગૃહ આજે મરવા વાંકે જીવી રહ્યું છે. લાખો-કરોડોના ખર્ચે તૈયાર કરવામાં આવેલી આ ઈમારત આજે માત્ર ખંડેર બનીને રહી ગઈ છે. આ કોઈ કુદરતી આપત્તિ નથી, પણ તંત્ર દ્વારા કરવામાં આવેલી ‘સરકારી હત્યા’ છે.
એક સમયે જ્યા નેતાઓ અને અધિકારીઓની અવરજવર રહેતી હતી, આજે ત્યાં જંગલી ઝાડી-ઝાંખરા ઉગી નીકળ્યા છે અને છત પરથી પોપડા ઉખડી રહ્યા છે. પ્રજાના પરસેવાના કમાણીના પૈસા જ્યારે સરકારી તિજોરીમાં જાય છે, ત્યારે તેનો ઉપયોગ આવા ભવનો બનાવવા માટે થાય છે, પરંતુ તેની જાળવણી માટે તંત્ર પાસે સમય નથી. પાલિકાના ભોગે અને પ્રજાના નસીબે આ મિલકત આજે દયનીય હાલતમાં છે. અધિકારીઓ પોતાની એસી કેબિનમાં બેસીને ઠંડી હવા ખાય છે અને જનતાના પ્રશ્નો પ્રત્યે આંખ આડા કાન કરે છે.
આ ઈમારતની હાલત જોતા પ્રશ્ન થાય છે કે શું સરકાર માત્ર નવી યોજનાઓ જાહેર કરવામાં જ માને છે? જૂની મિલકતોની જાળવણીની જવાબદારી કોની? પાલીતાણાની જનતા આજે પૂછી રહી છે કે અમારા ટેક્સના પૈસાનો આ રીતે ધુમાડો ક્યાં સુધી ચાલશે? વિશ્રામ ગૃહના નામે ઉભું થયેલું આ ખંડેર તંત્રની અણઆવડતનું સૌથી મોટું પ્રમાણપત્ર છે. જો હજુ પણ જાગૃત થઈને આ ભવનનું સમારકામ કરવામાં નહીં આવે, તો આગામી દિવસોમાં આ સ્થળ માત્ર કાગળ પર જ અસ્તિત્વ ધરાવશે. જવાબદાર અધિકારીઓ સામે શિક્ષાત્મક પગલાં ભરી જનતાના નાણાંનો હિસાબ માંગવાનો સમય હવે પાકી ગયો છે.
