ઓડિશામાં ઇતિહાસનો સૌથી મોટો IT રેડ: ₹352 કરોડ જપ્ત
ઇતિહાસનો સૌથી મોટો IT રેડ: ઓડિશાની ડિસ્ટિલરી કંપનીમાંથી 10 દિવસમાં ₹352 કરોડ જપ્ત, નોટો ગણવા 3 ડઝન મશીન લાગ્યા
(નવી દિલ્હી/ઓડિશા)
ભારતીય આવકવેરા વિભાગે ઓડિશામાં દારૂ બનાવતી કંપની, બૌધ ડિસ્ટિલરીઝ પ્રાઇવેટ લિમિટેડ પર દરોડા પાડીને ઇતિહાસનો સૌથી મોટો ઓપરેશન પાર પાડ્યો છે. આ દરોડો સતત 10 દિવસ સુધી ચાલ્યો હતો અને તેમાંથી ₹352 કરોડની જંગી રોકડ રકમ જપ્ત કરવામાં આવી હતી. આ રકમ એટલી મોટી હતી કે તેને ગણવા માટે ત્રણ ડઝનથી વધુ નોટ ગણવાના મશીનો અને વિવિધ બેંકોના કર્મચારીઓની મદદ લેવી પડી હતી.
કંપનીના અનેક વિભાગોને નિશાન બનાવીને પાડવામાં આવેલા આ દરોડા દરમિયાન આવકવેરા વિભાગે ભૂગર્ભમાં દટાયેલી કિંમતી વસ્તુઓ શોધવા માટે સ્કેનિંગ વ્હીલ મશીનનો પણ ઉપયોગ કર્યો હતો, જે આ ઓપરેશનની ગંભીરતા દર્શાવે છે. જપ્ત કરાયેલી રોકડ ટ્રકોમાં ભરીને કડક સુરક્ષા હેઠળ વિભાગની ઓફિસમાં જમા કરવામાં આવી હતી.
આ સફળ કાર્યવાહી માટે કેન્દ્ર સરકારે દરોડાનું નેતૃત્વ કરનારા મુખ્ય નિયામક એસ.કે. ઝા અને વધારાના નિયામક ગુરપ્રીત સિંહ સહિતના અધિકારીઓનું સન્માન કર્યું હતું. આ રેડ માત્ર આવકવેરા વિભાગની સફળતા જ નથી, પરંતુ દેશમાં ભ્રષ્ટાચાર અને કાળા નાણાં સામે સરકારની સતત અને મક્કમ કાર્યવાહીનું સ્પષ્ટ પ્રતીક છે.
